Սկիզբ
> ՀԱՄԱԳՈՐԾԱԿՑՈՒԹՅՈՒՆԸ
Համագործակցությունը
Մշակութային երկխոսությունը այսօր անհրաժեշտություն է բոլոր ժողովուրդների համար, քանի որ միայն առողջ համագործակցությամբ հնարավոր կլինի փրկել ու պահպանել մարդկության ստեղծած մշակութային ժառանգությունը, որ պատերազմների ու բռնությունների հետևանքով հաճախ ենթարկվում է ոչնչացման կամ անտարբերության պատճառով պարզապես տրվում մոռացության: Հայաստանը` իբրև հնագույն քաղաքակրթության օրրաններից մեկը, սկսած անհիշելի ժամանակներից, մշակութային բազմաթիվ շերտեր ունի, որոնց պահպանությունն այսօր ոչ միայն պետական, այլև համամարդկային խնդիր է և այդ իսկ պատճառով՝ պետության համագործակցությունը լայն շրջանակների հետ ուղղակի անհրաժեշտություն է: Դրա կողքին ներկայում էլ շարունակվում է մշակութային արարչագործությունը, որի հետաքրքրությունը ոչ միայն երկրի ազգային բնիկ տարրի` հայերի ստեղծագործությունն է, այլև նրա հետ միասին նույն հողի վրա ապրող
բոլոր այն ազգերի, որոնք 100-200 տարի (ասորիներ, եզդիներ, քրդեր, ռուսներ, հույներ) կամ արդեն մի քանի տասնամյակ (ուկրաինացիներ, լեհեր, բելառուսներ, գերմանացիներ, վրացիներ, հրեաներ) Հայաստանը համարում են իրենց 2-րդ հայրենիքը: Այստեղ նույնպես պետությունը առանց
համագործակցելու հասարակական լայն խավերի հետ ՝ չի կարող լուծել մշակույթի զարգացման ու տարածման դժվարագույն խնդիրները։
ՀՀ մշակույթի նախարարությունը, լինելով պետության լիազորված մարմինը մշակույթի ոլորտում, իր գործունեության քաղաքականության իրականացման գլխավոր առանցքը համարում է շփումներն ու համագործակցությունը պետական, մասնավոր, հասարակական, միջազգային կազմակերպությունների հետ։
սկիզբ
վերև